La XDLA critica’l tratamientu informativu de TPA pa cola llingua asturiana

XXV Conciertu pola Oficialidá, Xixón. Imaxe: Pablo A. Quiroga Prendes

XXV Conciertu pola Oficialidá, Xixón. Imaxe: Pablo A. Quiroga Prendes.

La Xunta pola Defensa de la Llingua Asturiana (XDLA) consiguió aconceyar a más de 1.500 persones nel XXV Conciertu pola Oficialidá que se celebró’l 8 de xunu pasáu nel Parque Inglés de Xixón. Esti eventu ye ún de les cites culturales más importantes pola so trayectoria nel panorama asturianu.

Con too, la XDLA criticó la falta de cobertura que-y dieron los medios de comunicación asturianos al eventu, que namás informaron d’él a posteriori. Nun comunicáu la plataforma de defensa de los derechos llingüísticos mostró’l so desacuerdu cola postura de los medios informativos privaos “anque poco pue dicir la XDLA más allá de lo criticable que ye dexar el so compromisu deontolóxicu de llau”. Pero con quien foi mui crítica foi cola TPA por ser un mediu públicu  y que d’alcuerdu cola llexislación vixente “tien qu’usar y fomentar l’idioma, amás d’atender al interés xeneral de la sociedá asturiana”.

La XDLA afirma que naide pue negar que la llingua y la cultura propia tienen interés dientro de la nuestra sociedá y “na TPA sábenlo bien al ver les audiencies de los sos programes n’asturianu”. Y lo mesmo pue dicise del Conciertu pola Oficialidá: 25 ediciones y éxitu de públicu. Esti colectivu non solo ye critica cola TPA por cuenta del Conciertu pola Oficialidá, sinon que tamién refuga que nengún equipu del ente públicu autonómicu fora a la inauguración -el 4 de xunu- de la esposición sobre los 25 años de trayectoria del conciertu que se celebró na Plaza’l Pescao, na capital asturiana. “Tampoco nun acudió la televisión que dicía ser reflexu d’Asturies a la rueda de prensa que se fixo’l vienres 7 d’esi mesmu mes pa presentar la edición que fixo’l mediu sieglu”. Nesi sentíu, la XDLA esplica que dende’l diariu dixital Vilaweb -el más lleíu nesti idioma- punxéronse en contactu cola plataforma cívica “porque queríen publicar una crónica sobre los 25 años del conciertu”. Por esti motivu la XDLA asegura que dende fuera d’Asturies “saben reconocer el compromisu de llevantar 25 ediciones de conciertos de música n’asturianu col trabayu que supón y tola actividá económica que xenera”. Nun foi hasta’l domingu 9 de xunu cuando la TPA recoyera esti eventu dientro de la primer edición de los sos informativos, nos díes previos al eventu nun se dio nada “nun fore ser que-y dieren publicidá a la cita, debieron pensar cuando los responsables del informativu decidieron dedicar unos segundos pa falar del conciertu. Amás, consideraron más destacable una caravana del amor en Piloña o la misa del Obiespu Auxiliar”, criticó la XDLA.

Por too ello, esta plataforma refuga l’actitú tanto del ente públicu asturianu como de TVE -que tamién ye una televisión pública que tien programación p’Asturies- pa cola llingua y cultura asturiana “marxinando’l so usu na televisión y na radio y escondiendo les actividaes qu’entama la sociedá civil pa da-y una mayor proyección de futuru al nuestru idioma. Mentanto, Radio Sele -emisora que ta nuna situación precaria y a la que’l Gobiernu del PSOE robó-y la llicencia d’emisión- tuvo años emitiendo en directu’l Conciertu pola Oficialidá. La RPA podía garrar esi testigu teniendo en cuenta qu’actualmente nun tien programa nengún onde se promocione la nuestra música”, esplica la XDLA.

Anuncios

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s